أخبار الأردن- نبراس نيوز- بقلم أمين زيادات: يا ريت ضلينا زغار لا همّ ولا عصبية، يا ريت ضلينا زغار نعمل الي بدنا اياه بدون مسؤولية.
يا ريت ضلينا زغار كل تفكيرنا باللعب والأكل، كنا زغار وكنا نستنى العيد عشان نجمع دينار عيديه ونلعب بالمرجيحيه.
كبرنا وصار العيد علينا همّ، والدينار الي أخذناه صار لازم نسدوا ميه، والمرجيحة الي كنا نلعب عليها صارت تلعب فينا.
كنا زغار وما كنا نعرف الكذب والنفاق، صرنا كبار وصار الكذب والنفاق لزوم الحياه.
كنا زغار وكنا نحب ببساطة وبراءة وكان وجهنا يصير أحمر من الخجل، كبرنا وصار الحب كذبه ومصلحة والخجل ما عاد اله وجود.
كنا زغار وكنا نتقاسم اللقمة، كبرنا وصرنا نسرق من بعض اللقمة، كنا زغار وكنا نضحك من القلب، كبرنا وصارت حتى ضحكتنا كذبة.
كنا زغار وكنا نجتمع على الأكل العيلة كلها بحب وحنية، كبرنا وصرنا نجتمع على الاكل عشان نتصور بدون مشاعر ولا حب ولا علاقه عائلية .
كنا زغار والجار يساعد الجار وكنا نعرف كل الحارة، كبرنا وصار الجار ما يعرف الجار والحارة صارت عمارة.
كنا زغار وكنا نخاف من المس والمعلم، كبرنا وصار المس والمعلم يخافوا منا.
كنا زغار وكان الأخوان بحبوا بعض، كبرنا وصارت النسوان تعبي روس الأخوان على بعض ونصدق النسوان ونكذب بعض .
كنا زغار وما أحلى هذيك الأيام بقسوتها وبساطتها، كبرنا وصار تعبها بسهولتها.
كنا زغار وكان النا كبير، كبرنا والزغير بهل الزمن هو صار الكبير.
كنا زغار وأصحابنا بعدهم أصحاب، كبرنا وما عاد تقدر تعمل أصحاب.
كنا زغار وكنا لما نطبخ نطعمي الجيران، كبرنا وصرنا نطبخ ونصور ونزل على الفيس ونشهي الفقير والجوعان.
كنا زغار وكان عنا أخلاق وكنا نعرف العيب، كبرنا وما عاد في أخلاق وما عاد في اشي اسمه عيب.
كنا زغار ،بس كنا كبار ……….. يا ريت ضلينا زغار، يا ريت ضلينا زغار ؟؟!!
